По кратко боледување, на 60-годишна возраст, почина поранешниот републички обвинител Марко Зврлевски, соопшти Јавното обвинителство.
Тој починал како компликации од ковид-19.
Зврлевски беше роден на 04 декември 1960 година во Дебар. Основно и средно образование завршува во Скопје. Дипломирал на Правниот факултет „Јустинијан Први“ при Универзитетот „Св. Кирил и Методиј“ во Скопје.
Работното искуство го започнал при Македонската академија на науките и уметностите (1988-1989), по што кратко време работел и како новинар во МРТ.
Најголемиот дел од кариерата Зврлевски се занимавал со јавнообвинителска работа. Започнал како приправник по правна струка во тогашното Општинско јавно обвинителство во Скопје (1989-1991), потоа бил стручен соработник (1991-1998), па адвокат од областа на казненото право (1998-2000), за потоа да стане заменик-јавен обвинител во Основното јавно обвинителство – Скопје; (2000-2005).
Во декември 2005 година беше распореден во Одделението за гонење на сторители на кривични дела од областа на организираниот криминал и корупција, а по трансформирањето на одделението, беше избран за јавен обвинител во Основното јавно обвинителство за гонење на организиран криминал и корупција.
Од ноември 2009 до јануари 2013 година раководеше со Основното јавно обвинителство – Скопје, а од јануари 2013 година беше именуван за Јавен обвинител на Република Македонија која функција ја извршуваше до август 2017 година.
Последните години тој работеше како адвокат.
