Одлична вест за нашите граѓани во странство. Собранието на Република Северна Македонија тукушто ги помина измените и дополнувањата на законот за патни исправи на државјаните на Република Северна Македонија со кои на оние граѓани кои им е истечена патната исправа, или истекува после 31 јули, се продолжува рокот на важење на овие документи до 31 декември 2021, напиша на Фејсбук министерот за надворешни работи Бујар Османи.
Со тоа, како што посочува, конечно им се излезе во пресрет на потребите на голем број наши граѓани кои поради пандемијата, рестриктивните мерки, карантините, и другите отежнати услови, беа спречени навремено да ги продолжат своите документи.
-Продолжуваме понатаму и со проектот за е-конзулат, со мобилни базни станици, со кои наскоро целосно и долгорочно ќе го затвориме прашањето за издавање патни исправи во странство, пишува Османи.
Како што пишуваше 24 Инфо пред два месеци, над илјада македонски граѓани се заглавени во дијаспората поради истечени пасоши и немаат можност да извадат нови. Проблемот е најголем во Австралија и Кина, но има наши граѓани со истечени пасоши и низ цела Европска унија. На социјалните мрежи веќе има и група „Нова процедура за пасош“ во чиј состав се потпишува петиција за решавање на проблемот во најкус можен рок. Петицијата е потпишана од над 3.000 луѓе.
До конечно решавање на проблемот Сите Македонци кои имаат истечени македонски пасоши и се заглавени во странски земји во кои живеат или работат за да извадат нов пасош мора да се вратат во земјава.
