Негувателка повредила дете во градинката „Детска радост” во Автокоманда во Скопје. Детето се вратило дома со крвава рана на главата. Според неофицијални информаци на мкд.мк детето раскажало дека раната ја добило откако вработена го удирала со лажица по глава бидејќи му се истурило јадењето.
Дека има пријава за ваков настан за МКД.мк потврди и директорката на градинката, Анета Петровска. Таа вели дека е точно дека детето имало рана на главата, но сѐ уште се утврдува што се случило и укажа дека целосна информација за настанот официјално ќе ни соопшти откако ќе заврши истрагата и ќе се знае што навистина се случило.
„Јас до овој момент прибирав податоци и документација и други насоки за постапување по случајот. Секако дека ќе постапиме согласно законот, и се што истиот ни налага ќе биде испитано. Пријавата за настанатата повреда кај детето е од родителите. Ќе биде формирана и комисија која ќе го испита целиот овој случај, па дополнително ќе ја известиме јавноста со сите официјални податоци. За сега да ја почитуваме презумцијата на невиност и додека не се утврди што точно се случило, не можам да давам било какви информации со кои би и наштетила на истрагата”, изјавила директорката Петровска.
Вработената негувателка, која е пријавена дека наводно го повредила детето, и денес е на работно место во градинката, но како што вели Петровска преземени се претпазливи мерки и таа не е со децата.
“Во групата во која се случил инцидентот имало 15 дечиња на возраст од 2 до 6 години. Во градинката има камери на влезот и излезот, но не и во занималните каде што се чуваат децата, бидејќи не е дозволено да се снима”, вели Петровска.
За случајот вчера извести и МВР. Од таму беше соопштено дека завчера во 19:30 часот во СВР Скопје 41-годишна скопјанка пријавила дека во градинка во населба Автокоманда нејзиното дете било физички нападнато со тврд предмет од вработената Б.Ф. Се преземаат мерки за расчистување на случајот.
