Илија Николов од Бугарија, еден од луѓето кои први се јавиле на телефонот за итни случаи 112 за да ја пријави автобуската катастрофа, за Бугарската национална телевизија открива нови детали за инцидентот во кој животот го загубија 46 македонски граѓани.
Николов работи на објект на 500 метри оддалеченост од несреќата и заедно со колегите санира свлечиште во близина на автопатот. Во кобната ноќ тој спиел во кампот на објектот.
– Слушнав едно грмење, но не можев да сфатам што беше. Се симнавме со колегата надолу кон Кулата и гледаме дека нешто во заштитната ограда гори. Гореше по малку, а потоа се засили постепено наназад. Се приближивме и сакавме да помогнеме, но немаше како. Веќе многу гореше, не можевме да се приближиме – изјави Илија за БНТ.
Според него, веќе имало луѓе кои излегле од автобусот на левата лента од патот. – Ми зборуваа на непознат јазик, не разбрав од каде се – додава тој.
Веднаш откако виделе дека се случила катастрофа, неговиот колега звони на 112, а тој земал рефлектор и почнал да сигнализира на автомобилите кои доаѓале. Многу возачи сопреле натрчале да им помогнат на повредените.
– Полицијата дојде за 17-18 минути и ние потоа заминавме нагоре кон базата. А, кога се симнувавме надолу видовме парчиња гуми кои горат.
Според него, мирисало на изгорено, но не почувствувал мирис на гориво. Дали заштитната ограда ја спречила задната врата да се отвори, не може да се присети затоа што се се случило многу брзо и било многу темно.
Извор: btvnovinite.bg
