Заканувачки смс пораки доколку на време не си ги подмирите ратите за брз кредит се честа слика. Граѓаните реагираат дека доколку задоцнат со исплатата, следуваат високи камати, истовремено и пораки со заканувачка содржина, контактирање на членовите од семејството, но и работодавачите. „Дали законски е дозволено доколку земете брз кредит и навремено не ги подмирите ратите, да се испраќаат заканувачки пораки?“, ги прашавме од Организацијата за заштита на потрошувачи. Од таму потврдија дека ваквата слика е честа, но решението не е да се праќаат пораки со вознемирувачки содржини.
„Со самото тоа што ние земаме потрошувачки брз кредит, со тоа што го потпишувате договорот се согласувате на условите. Меѓутоа, тие услови се да се контактира лицето, да му се прати пораки и слично, но не и тие да бидат заканувачки, туку во рамки на границата. Сега во случај да не се отплати кредитот, давателот на кредитот, односно финансиското друштво може да го прати на извршител, но не и да испраќа заканувачки пораки. Потрошувачите често се јавуваат кај нас, се жалат токму на тој проблем, дека имаат високи камати за брзите кредити, но и дека често добиваат заканувачки пораки. Постојано им се закануваат, дали телефонски, дали преку пораки, поради задоцнување на ратата“, истакна Мартина Грнчаревска од Организацијата на потрошувачи.
Дополнително на ова, од организацијата истакнаа дека граѓаните за вакви ситуации би требало да пријават во полиција, со цел да се спречи ваквата пракса во иднина.
„Кога некој од нас како потрошувач ќе се соочи со тој проблем, добро е да пријави веднаш во МВР, бидејќи им се праќаат заканувачки и вознемирувачки пораки од страна на финансиското друштво. Друг начин е да се пријави во Министерство за финансии како институција која ги дава дозволите за работа на финансиското друштво и најпрво да се обратат до финансиското друштво со барање да не се испраќаат повеќе такви пораки. Понатаму да се пријави и во МВР“, додава Грнчаревска.
Прашањето „Како се потсетува клиентот за неплатен долг (дали се праќаат пораки со несоодветна содржина)?“ го поставивме и на Асоцијацијата на финансиски друштва, меѓутоа на истото не добивме одговор.
Од страна на СВР Штип, пак, истакнаа дека до сега кај нив не е регистрирана пријава од страна на граѓани за заканувачки пораки од финансиски друштва. Истовремено, и од таму апелираат доколку има вакви појави, да се пријави во полиција, со цел ова во иднина да не се повторува.
