Актерот и политичар Арнолд Шварценегер имал сообраќајна незгода во Лос Анџелес, потврди неговиот портпарол.
Локалната полиција соопшти дека четири возила се судриле на раскрсница во Брентвуд во петокот попладне и дека едно лице е повредено.
На фотографиите од местото на настанот се гледа џип што се судрил со уште најмалку две возила, а на сликата се гледа како Шварценегер стои во близина. Неговиот портпарол потврди дека Шварценегер бил зад воланот на џипот во моментот на несреќата.
Засега никој не е приведен, а полицијата соопшти дека никој од учесниците не бил под дејство на дрога или алкохол.
Според полицискиот извештај до кој дојде Си-Би-Ес, возачот на џипот поминал на црвено и свртел лево, по што удрул во друг автомобил, што завршил под него, а во судирот се оштетени уште две возила.
Сведоците велат дека сцената изгледала „лудо“, како од акционен филм.
Портпаролот на Шварценегер изјави дека актерот не е повреден и дека на лице место разговарал со припадниците на итната помош и со повредениот, возачот на вториот автомобил, кој не е во животна опасност.
Полицијата започна истрага за околностите на несреќата.
