Притвор од 30 дена и куќен притвор од 30 дена одреди судијата за двете лица одговорни за испораката на еден тон материјал на скопскиот аеродром од кој може да се направи амфетамин во вредност од 50 милиони евра.
Основниот кривичен суд Скопје на осомничениот Н.К. му определил мерка притвор во траење од 30 дена, а на осомничениот М.З. му определи мерка куќен притвор во траење од 30 дена.
Решенијата се донесени поради опасност од бегство, можност да се попречи истрагата и да се влијае на сведоци, како и можност да се повтори делото. Против овие решенија странките имаат право на жалба пред Кривичниот совет.
МВР вчера на скопскиот аеродром заплени 40 пакувања хемиска материја во вкупна тежина од 1105 килограми. Двете уапсени лица се дел од меѓународна криминална група.
Според лабораториските резултати добиени од примерок од пратката, станува збор за супстанца – прекурзор „1 Phenyl – 2 Propanone“ што според член 3 од Законот за прекурсори спаѓа во прва категорија согласно ратификуваните меѓународни договори и меѓународните нормативи и стандарди. Оваа хемиска материја позната уште и како Phenylacetone и Benzyl Methyl Ketone BMK (P2P) претставува прв прекурзор за добивање на амфетамински тип на стимуланс и се користи за илегално изработување на амфетамин, метамфетамин и МДМА – таблети екстази.
