Саше Митев е нашинец од Струмица, а сега живее во Швајцарија. Денеска тој исполни уште голема детска желба. Својата гитара ја донираше на дете чија желба беше токму тоа.
Се започна со барање од еден родител во една популарна група на друштвената мрежа Фејсбук.
„Браќа некој да не има гитара стара ми треба за мое дете нека пише цена и модел. Немам многу пари ама морам да и ја остварам желбата“, гласеше објавата на Фејсбук.
Саше Митев се јави веднаш во коментар. Понуди бесплатно да донира акустична или електрична гитара. Неговата објава наиде на над 1.400 поздрави и честитки за големиот потег.
ТВ21 контактираше со Саше Митев, вели дека ова не му е прва донација, но не сака да експонира јавно работи кои треба да бидат сосема нормални.
„Би сакал да ја разбудам свеста меѓу нас и мислам дека со ова мало дело успеав барем малку во намерата“, ни рече во разговорот Митев.
Додава дека радоста на децата е нешто што ги грее срцето и душата.
„Детската насмевка нема цена“, ни рече Митев.
Тв21
