Утрово кога вработените во 5,30 часот стигнале во Детската градинка „Димче Мирчев“ од Велес, клон 6 Ѕвончица откриле дека е извршена кражба на храната, која ја имаат складирано во магацинскиот простор. Тој бил буквално испразнет оти крадците не оставиле ниту трошка храна. Веста за кражбата ја потврдија и портпаролот на СВР Велес Ристе Самарџиев и директорката на Детската градинка Димче Мирчев“ Маја Велиновска.
„Украдена е храната од централната кујна со која се снабдуваат сите шест клона во Велес. Итно ги набавивме сите потребни артикли за денешниот ручек и децата не почувствуваа дека е извршена кражба. Поради вршење на увид од страна на полицијата, децата претпладнето беа префрлени да се згрижат во други клонови“, кажа директорката Велиновска.
Во магацинот во текот на денот се врши вонреден попис, за да се утврди што сè е украдено. Но сигурно е дека биле украдени околу 100 кг масло за јадење, 100 кг брашно, шеќер, сол, ориз, грав, кашкавал, сирење. Од вецето биле украдени неколку славини за вода.
Дека крадците работеле сериозно, зборува и тоа што пред да ја извршат кражбата го онеспособиле видеосистемот од објектот, а ја украле и количката за дистрибуција на роба, за да не ја пренесуваат украдената стока сами на раце.
П. ПЕЧКОВ Сдк.мк
