Градоначалникот на Карпош, Стевчо Јакимовски, за време на денешната посета на градинка во населбата, заедно со министерката за труд и социјална политика Јованка Тренчевска, реши да им се придружи на дечињата, кои цртаа со дрвени боички.
За ова извести Општина Карпош на социјалните мрежи, а на една од фотографиите се гледа и што им нацртал градоначалникот на децата – голема зграда со многу прозори и посебно нагласен покрив.
Изборот за темата за ликовно изразување на Јакимовски наиде на иронични реакции на социјалните мрежи, со оглед на тоа што токму актуелниот градоначалник, во неговиот претходен мандат беше обвинуван за безмилосна „бетонизација“ на населбата со издавање стотици дозволи за градба на згради.
„Што ти е потсвест, седнал Стефчо со дечиња во градинка. Дечињата ја цртаат планетата Земја, а Стефчо црта згради, ЗГРАДИ…“, се вели во една од реакциите на социјалните мрежи.
