Веќе една недела средношколците од село Селце кои наставата ја следат во Тетово, наидуваат на проблеми со превозот. Честопати не стигнуваат ниту на првиот час, бидејќи превозот се врши само со две комбиња со максимален капацитет од 8-9 лица, а вкупно има околу 55, велат нивните родители.
Родителите се жалат дека околу половина од учениците секој ден кога заминуваат на училиште остануваат на пат, ангажирајќи ги родителите да ги однесат на училиште, бидејќи фирмата ангажирана од општината има само две комбиња кои земаат вкупно 18-20 ученици, додека ова село што го гледате зад мене има 55 ученици кои секојдневно ги посетуваат средните училишта во Тетово.
„Учениците се малтретираат затоа што 15-16 ученици одат со едно комбе. Тие се веќе возрасни. Во едно комбе ги земаат по 16-17“, рече еден родител.
„Има приближно 55 ученици, а во оптек се само две комбиња. Дури и јас не знам колку можат тие да носат. Осум лица им е лимитот, а другите ги оставаат со приватно такси. Го испратив син ми приватно. Три дена отсуствуваше од училиште, три дена го праќав приватно“, истакна друг родител.
Н: Ако општината и претпријатието не најдат решение пред почетокот на зимата, ќе ја бојкотирате ли наставата?
„Да, се разбира, се разбира. И оваа недела, ако не се реши оваа работа, тогаш бојкотот ќе биде стопроцентен, бидејќи родителите секојдневно се жалат, учениците отсуствуваат од настава“, додаде тој.
„Општината треба да пушти комбе како што треба за да ни биде малку поудобно, 17-18 луѓе каде ќе седат? Ова е катастрофа“, рече еден друг родител.
Од секторот за образование на општина Тетово ни рекоа дека не се информирани за случајот, но ветија дека брзо ќе го решат.
„Како општина официјално ја немаме оваа информација, никој од родителите не дошол да се пожали, меѓутоа како општина ќе ги преземеме сите мерки со фирмите кои се занимаваат со превоз на ученици и многу брзо ќе се реши ова прашање“, изјави Назми Даути, раководител на сектор за образование.
Селце не е единственото село кое го има овој проблем, комбињата се преоптоварени со ученици, евентуално за општината да има помалку за плаќање. Учениците се превезуваат со комбиња затоа што поради немањето општински Совет не можеше да се распише тендер за превоз. Општината делумно го реши проблемот со ангажирање на мали превозници./Alsat.mk
Башким Сулејмани
АЛСАТ
