Сопругата на премиерот Димитар Ковачевски, Елена, за прв пат откако е тој на функција имаше протоколарно појавување во јавност.
Во Њујорк таа присуствуваше на прием организиран од првата дама на Турција Емине Ердоган во рамките на промоција на иницијативата ,,Нула отпад”, а го придружува Ковачевски на Генералното собрание на Обединетите нации.
На настанот Ковачевска носеше креација на докажаната Тања Кокев, фустан со интересна бургунди боја, креација од последната колекција 2021 / 2022 на дизајнерката.
За ,,Фокус” Кокев вели дека ова е нејзина прва соработка со сопругата на премиерот.
Додава дека таа е една многу шик жена, ама на едноставен начин, скромна и едноставна.
-Креацијата плени со материјалот каде освен специфичната боја има и интересна текстурата создадена од геометриска комбинација на ситно и покрупно плисирани делови кои внесуваат разиграност во инаку класичниот крој. Се чини дека на Елена Ковачевска и прилега и бојата и кројот на оваа креација каде софистицираноста доаѓа од спојот на едноставноста со смелата боја-појаснува.
Дизајнерката беше задолжена и за изданието на Тамара, ќерката на Ковачевски во мај, кога таа го придружуваше својот татко во дводневната посета на Рим и Ватикан, и беше на прием кај Папата Франциск. Црниот фустан до под колена, со ракави направени од нежна тантела, и целокупниот изглед надополнет со вел и црни потпетици, тогаш наиде на позитивни реакции кај јавноста.
