На Сантијаго Санчес, шпанскиот фудбалски фан кој реши да тргне пешки до Светското првенство во Катар, му се изгуби трагата на 1. октомври. Немаше никаква информација за него, па многумина помислија дека е мртов, но стигна добра вест која во други околности ретко кога би била добра, тој се наоѓа во затвор во Иран.
Сантијаго Санчес на 9 јануари од Мадрид тргнал пешки кон Доха, планот му бил да стигне во Катар за Светското првенство. На патот на оваа негова авантура, тој постојано објавуваше фотографии на инстаграм и информираше каде е. Но тоа прекина да се случува на 1 октомври.
Неговата последна објава на инстаграм била од село во областа Пенџвин во Ирак, веднаш до границата со Иран. Потоа тој губи контакт со неговите најблиски и веќе нема објави на инстаграм.
Мистерија стана судбината на Санчес, како одминуваше времето се зголемуваа стравувањата дека тој веќе не е жив. Дека е убие во опасните области каде што патувал.
Но, иранската национална телевизија објави вест која ги израдува најблиските на шпанскиот авантурист, тој е жив, но се наоѓа во ирански затвор.
Информацијата вели дека Санчез бил уапсен во Сакез, град во курдинстанската провинција во Иран. Што е веднаш до границата на Ирак. Тој е уаспен заедно со неговиот преведувач.
Еден негов пријател од Мадрид, Мигел за весникот „Марка“ вели дека според него, Сантијаго бил затворен поради тензичната политичка ситуација во Иран во моментов.
„На 2 октомври неговите последни зборови беа ‘овде малку е жешко, но добро е’, мислејќи на конфликтите и политичката тензија во Иран. Сигурно е задржан и затворен додека не се смири ситуацијата таму. Тие не сакаат никој да вади надвор никаква информација за случувањата и за животот кај нив“, вели Мигел за „Марка“.
Засега не е познато кога ќе биде пуштен Сантијаго Санчес од затвор, но тоа што е најважно е дека тој е жив.
