Ова е мерцедесот на велешанецот Ангелче Николов со кој пред два дена е усмртена 11 годишната Магдалена, а тешко повредена нејзината мајка. Автомобилот стигна во полициска станица истиот ден кога и неговиот сопственик, осомничен дека го возел и ја преизвикал несреќата е уапсен. Тој два дена се криеше од полицијата. Утрово е лоциран во населбата Превалец близу Велес, каде што живее, и е приведен.
“ Денеска (19.12.2022) во 11.30 часот, по преземени мерки и активности, полициски службеници од СВР Велес во Велес го лишија од слобода А.Н.(29) од Велес, кој на 17.12.2022 околу 22.15 часот на ул.„Борис Трајковски“ во Велес со патничко возило „мерцедес“ со велешки регистарски ознаки удри во пешаците Е.И.(43) и нејзината малолетна ќерка, по што го напушти местото. Притоа, малолетното девојче почина на местото, а нејзината мајка се здоби со телесни повреди. Лицето е приведено во полициска станица и по целосно расчистување и документирање на случајот, во координација со јавен обвинител, против него ќе биде поднесена соодветна пријава”, рече Ристе Самарџиев, портпарол на СВР Велес.
Батали.нет дознава дека 29-годишниот Николов признал дека тој го возел автомобилот, дека бил под дејство на алкохол и дека се исплашил од несреќата, па затоа побегнал. Откако ќе биде однесен во обвинителстото, ќе се знае дали ќе добие притвор. Но, тој не бил сам во автомобилот. Со него биле уште тројца пријатели, со кои претходно бил во кафеана.
Откако ги удрил мајката и детето, Николов прво ги оставил пријателите, а потоа побегнал. Полицијата ги идентификувала според заедничка фотографија, која Ангелче вечерта, непосредно пред несреќата, ја објавил на Фејсбук. Тие вчера се повикани на распит во полиција. Сега обвинителството треба да реши дали и против нив ќе покрене постапка за прикривање на кривично дело, бидјќи никој од нив не се јавил да ја пријави несреќата.
