Четириесет и петгодишен битолчанец пред два дена завршил на скопската Клиника за токсикологија во лоша здравствена состојба, потврди директорот на болницата, доктор Ридван Бајрами во изјава за „Фокус“.
Според првичните информации, пациентот тврдел дека во кафуле во Битола побарал кисела вода и се отрул откако се напил само една голтка.
Вели „се напив една голтка и осетив дека не е вода“. Интоксикација со корозивно средство има пациeнтот. Не знаеме како е дојдено до тоа, но таква изјава дава, дека бил во кафуле и кога ја отворил водата, од првата голтка почувствувал дека тоа не е вода“, објаснува доктор Бајрами.
Тој додава дека полицијата и обвинителството веќе се известени, а каква ќе биде здравствената состојба на пациентот, тек ќе се следи.
„Во системот има корозивно средство, почнати се испитувања, пациентот е на опсервација. Со овие средства, последиците се чувствуваат подоцна, така што мора да се набљудува. Кај нас е на интензивна нега. Засега не можеме да кажеме ништо, само ќе ја следиме неговбата состојба“, вели за Фокус, директорот на болницата.
Корозивите се група на хемикалии кои имаат својство да предизвикаат повреда на ткивата при контакт со хемиска реакција.
Тие најчесто влијаат на гастроинтестиналниот тракт (ГИТ), респираторниот систем и очите. Корозивите и каустиците се синоними, и двете значат „нешто што јаде“. Киселините и алкалиите се двата примарни типа на агенси кои најчесто се одговорни за каустична изложеност.
Изложеноста на корозивни агенси продолжува да биде водечки токсиколошки извор на повреда за деца и возрасни. Просечен дом содржи десетина различни производи за чистење. Овие отпаѓаат на голем број случајни и намерни труења.
Ирена Мулачка Фокус
