Неколку вработени од затворот „Идризово“ се суспендирани, откако пред околу еден месец беше откриен тунел, во кој учествуваше група од најмалку осум затвореници, осудени за сериозни кривични дела.
Ова го изјави директорот на затворот „Идризово“ Зоран Јовановски во интервју за Макфакс, но потенцираше дека точниот број на суспендирани вработени ќе биде соопштен откако ќе заврши обвинителниот акт.
Тунелот е ископан на длабочина од околу еден метар, во дијаметар од околу 80 сантиметри и бил соодветно обезбеден со попречни греди и тули.
Во тунелот се пронајдени повеќе пластични корпи на кои се врзани јажиња, а со кои се извлекувала ископаната земја и електричен кабел со сијалица, која им служела за осветлување на тунелот, соопшти Управата.
По информацијата за откриениот тунел за бегство од „Идризово“, Владата на седница го разреши директорот на затворот, Шпенд Тахири, и на негово место го назначи актуелниот директор.
