Активистот за човекови права и слободи Суад Мисини го започна најавениот штрајк со жед. Оваа негова постапка доаѓа како резултат на негрижата на институциите да не одобрат законски измени во корист на лицата за кои државата нема никаква евиденција, познати како граѓани фантоми. Според него, за еднаш засекогаш да се реши овој проблем мора да се сменат законите за лична карта и за живеалиште. Оптимист е дека институциите навреме ќе интервенираат.
Треба да престане дискриминацијата која постојано им се прави на овие луѓе. Ова е држава, членка е на НАТО, има цивилизација и Устав. Немаме друг начин да го докажеме ова на дело освен да имплементираме стандарди. Не зборувам за меѓународни стандарди, туку за елементарни стандарди: право на живот. Потребни ни се домашни стандарди почнувајќи од Уставот, кои не треба да бидат тоалетна хартија. Мора да изградиме република“, изјави Мисини за Алсат.
Повикувајќи се на медицинските препораки, штрајкот од жед се смета за еден од најопасните удари по здравјето на луѓето и не може да трае повеќе од 3-4 дена. Но, Мисини вели дека е свесен за тоа што го прави.
„Оваа акција ја преземам со целосна свест. Не постои друг начин да се нагласи итната важност за итно средување на оваа област. Зборуваме за животот и судбината на луѓето. Не смееме да си играме“, рече Суад Мисини, Активист за слободи и човекови права.
Собранието минатата недела ги изгласа измените на Законот за матична евиденција, преку кои се овозможува евидентирање на околу 700 лица кои не се запишани во државниот регистар или се јавуваат во Евиденцијата на неевидентирани.
Новороденчињата треба да се запишат најдоцна во рок од 45 дена од датумот на раѓање, а до декември годинава во матичната евиденција мора да бидат вклучени и возрасните, малолетните и децата. Поради недостиг на документи, скопјанецот Мемет Камбер остана речиси 10 дена во мртовечница, а неговото семејство не можеше да го погребе.
