Синоќа на сцената на Античкиот театар во Охрид започна 63-тото издание на најзначајната културно-сценска манифестација кај нас, фестивалот „Охридско лето”.
Пред присутните, меѓу другите, се обрати и министерката за култура, Бисера Костадиновска Стојчевска, која на самиот крај од нејзиниот говор, гласно пред сите, им упати порака на охридските угостители.
-Летната сезона во Охрид не трае долго време и затоа квалитетот, а не квантитетот му прилега на овој древен и скапоцен македонски град. Затоа имам една порака. Поради „Охридско лето”, и годинава на гости ќе ни дојдат многубројни уметници од целиот свет. Ги замолувам угостителите да не им наплатуваат како да треба да платат воена оштета или некои други ненамирени долгови од векови наназад. Ако овие зборови на луцидниот Душко Радовиќ допрат до нашите домаќини, им благодарам, напомена министерката Костадиновска Стојчевска.
