Лазар Нанев, поранешниот судија од Кавадарци кој беше разрешен од функцијата во октомври 2024 година поради 95 телефонски разговори со обвинет во предмет што самиот го судел, од 15 јули 2025 година е повторно вработен во Министерството за внатрешни работи – на позиција инспектор за општ криминалитет во кавадаречката полиција.
Како што потврдуваат од МВР за „Скопје1“, Нанев го искористил своето законско право да се врати на претходното работно место во рок од 30 дена по престанокот на функцијата судија. Пред да стане судија во 2002 година, Нанев бил вработен во МВР, а неговиот работен однос тогаш бил ставен во мирување со решение на тогашниот министер Љубе Бошкоски.
Поради престанување на причините за мирување на работниот однос, односно разрешувањето од судиска функција, Нанев поднесе барање за враќање на работа. Врз основа на тоа, согласно Законот за работни односи, е вратен на позиција што одговара на неговиот степен и вид на стручна подготовка“, информираат од Министерството.
И покрај тоа што повторно е вработен во полицијата, Нанев сè уште се соочува со кривично гонење за истиот случај поради кој беше разрешен. Судскиот процес против него е закажан за крајот на септември. Станува збор за сериозни обвинувања кои ја нарушија довербата во судството, а неговото враќање во МВР веќе предизвикува реакции во јавноста.
