Условна казна затвор од една година доби поранешната претседателка на Управниот одбор на Фондот за здравство, Елена Трпковска. Ова е прва пресуда во случајот со малата Тамара Димовска од Велес, која пред повеќе од пет години почина, чекајќи државата да и овозможи лекување во странство.
Трпковска заедно со уште единаесетмина лекари од двете комисии кои одлучуваат за лекувања во странство како и тогашните директори на Фондот, беше обвинета за несовесно работење во службата. Сепак, од здравствени причини, судењето за неа беше одвоено.
Судијата Марин Станевски ја донел ваквата пресуда во која се условува поранешната претседателка на Управниот одбор дека ќе оди во затвор, ако во рок од три години направи ново кривично дело.
Според обвинението дванаесеттемина обвинети во октомври 2014 година и го повредиле правото на малата Тамара Димовска да се лекува во странство. Таа имаше сериозно искривување на рбетот.
Мајката на малата Тамара, Жаклина Димовска поднесе барање за лекување на нејзината ќерка. Комисијата го одби барањето и не дозволи лекување во странство, а двајцата директори на Фондот за здравствено осигурување ја прифатија одлуката на Комисијата и ставија свој потпис на решениетo.
Неколку месеци подоцна Тамара почина, а решението за лекување во странство стигна по нејзината смрт.
Телевизија 24 денеска контактираше со мајката на Тамара, Жаклина Димовска, но таа не сакаше да ја коментира пресудата.
Пресудата за Трпковска се уште не е правосилна и течат роковите за жалба. Процесот против останатите обвинети доктори и директори започна во јуни 2017-та и се уште не е завршен. Следното рочиште е в петок.
