Украинската гранична полиција уапсила двајца сограѓани кои одлучиле во заштитената зона околу Чернобил да берат печурки, наводно за лична употреба.
Правилото да не се минува границата на заштитената зона во радиус од 30 километри околу нуклеарната електрана Чернобил и денес се почитува, што од страв од радијацијата, што поради украинската државна гранична служба која ја надгледува границата на заштитената зона.
Сепак, постојат луѓе кои се глуви за апелите од властите, иако се знае дека радијацијата во делови обраснати со вегетација е значително поголема. Така двајца Украинци, наводно за лична употреба, во забранетата зона набрале 40 килограми печурки и завршиле во притвор.
Изнесување на предмети, флора и фауна од Чернобил е строго забрането, бидејќи употреба во исхраната на било што што пораснало на загаденото земјиште по хаваријата во нуклеарната електрана во 1986-та година, би можело да предизвика смртни последици. Во Чешка, на пример, и натаму се предупредуваат жителите дека дивите свињи кои мигрираат од тие области не треба да се користат во исхраната поради контаминацијата.
Влегувањето во зоната строго го контролираат украинските власти и незаконски е да се премине границата на заштитената зона од 2.600 километри квадратни без дозвола. Според украинскиот закон, за кршење на оваа забрана предвидени се казни од парична, до три години затвор.
точка
