Дваесет и петгодишно момче Андреј Илиевски кој треба да се оперира од тумор на мозокот, а за тоа му се потребни 10.950 евра, ќе се лекува во Истанбул, откако апелот од родителите со споделување на Фејсбук бил виден од министерот за здравство Венко Филипче.
Семејството на момчето изминатите денови апелира до сите хумани граѓани кои сакаат да помогнат да донираат на телефонските броеви и на жиро-сметка. Активистката Ирена Ристиќ потврди дека сега за тоа нема потреба бидејќи семејството добило повик од министерот Филипче откако го видел апелот.
„Средствата кои беа потребни за оперативниот третман во Турција за Андреј Илиевски ќе бидат подмирени од страна на Фондот за здравство благодарение на министерот др.Венко Филипче кој денес стапи во контакт со семејството.
Благодарение на вашите споделувања, а ги имаше многу (тука во групава ричот беше над 17.000), веста стасала и до министерот Филипче, па он ми пиша, па го поврзав со семејството, па така бидна…Ако не споделувавте, ништо…“, објави Ристиќ.
– Подадете рака. На нашиот 25 годишен Андреј Илиевски му е дијагностициран тумор на мозок. Туморот мора да се отстрани со оперативен зафат кој не се изведува во Македонија. Операцијата ќе се изврши во Универзитетската болница КОЧ во Истанбул, Турција и чини 10.950 евра. Средствата треба да се обезбедат најдоцна до 25.07.2021 година. Вашата помош за нас значи живот. Од се срце Ви благодариме, гласеше претходно апелот од најблиските кој беше објавен и од медиумите.
Фактор
