Поранешниот селектор на македонската фудбалска репрезентација Игор Ангеловски – Мрме доби признание од Саше Тасевски, директорот на Бирото за јавна безбедност при Министерството за внатрешни работи.
„Голема благодарност до директорот на БЈБ м-р.Саше Тасевски за доделената плакета .Кога ќе добиете признание од голем човек и уште поголем професионалец а најважно од се долгогодишен другар задоволството е преголемо“, напиша на Фејсбук фудбалскиот стручњак кој за прв пат го одведе македонскиот национален тим на едно Европско првенство.
Доделената плакета е за партнерство и успешна реализација на целите од заеднички интерес на БЈБ и Фудбалската федерација на Македонија. На плакетата името на ФФМ е преименувано во „Фудбалска федерација на Република Северна Македонија“. Федерацијата до сега не објавила дека го променила своето име.
За време на настапите на македонската фудбалска селекција на ЕВРО 2020 Грција и премиерот Зоран Заев ја повикуваа ФФМ да го промени името согласно Преспанскиот договор бидејќи се работи за „организација која ја претставува цела нација“.
Ангеловски пред последниот настап против Холандија објави дека повеќе нема да биде шеф на стручниот штаб на македонската репрезентација.
FAKTOR
