Одделението за внатрешни работи од Дебар поднесе кривична пријава за „измама“ против 37-годишна жителка на Прилеп, која во Дебар се претставувала како бајачка.
– Таа, со намера да прибави противправна корист, на 18 јули свесно довела во заблуда жителка на Дебар на која, претставувајќи се како бајачка, и побарала златен накит и не и го вратила, информираше Стефан Димоски, портпарол на Секторот за внатрешни работи од Охрид.
Од недоамна, особено по пристигнувањето на иселениците, на главната улица во градот е зголемен бројот на питачи, жени и деца, кои главно се од Прилеп и Велес, а ги има и од Битола и Гостивар.
Ова е редовна појава во летниот период кога во родниот крај доаѓаат иселениците за кои питачите велат дека се подарежливи од мештаните. За пазарење во Дебар секојдневно доаѓаат и луѓе од соседните општини Центар Жупа и Маврово и Ростуше, односно од долнореканскиот крај.
Полицијата во соработка со Меѓуопштинскиот центар за социјална работа спроведува акции за нивно отстранување од улиците, но тие повторно се враќаат во поголем број, посебно од средината на јули до крајот на август кога присуството на иселениците е најмасовно.
