Апелациониот суд за тешката сообраќајна несреќа која се случи во Струмица во која загина 20-годишната Верица Белчовска која беше прегазена на пешачки премин, донесе одлука 18-годишното момче кое ја прегази и го напушти местото на несреќата да добие казна затвор од две години и шест месеци.
Штипска апелација двојно ја зголеми казната за 18-годишниот струмичанец, откако Струмичкиот суд летово го осуди на казна затвор од 15 месеци, а семејството поднесе жалба.
Адвокатката на семејството на Верица вели дека за родителите таквата казна е неприфатлива и дека тие не биле известени за одржувањето на јавната седница.
„Минимална казна му е изречена на обвинетиот за две кривични дела, судот беше должен да го цени фактот дека на пешачки премин засекогаш згасна млад живот“, рече адвокатката Сања Мирчов.
Семејството Белчовски од беровско Русиново реагираа на донесената пресуда за возачот кој ја удри нивната ќерка Верче чии органи беа донирани.
Душанка Белчовска вели дека никој не може да ѝ ја врати ќерката, но ја боли што во самата постапка судот потклекнал на лаги дека обвинетиот со семејството се грижеле за нејзината ќерка:
„Дуплирана му е казната, но не сме задоволни. Животот на мојата ќерка не може да се врати, но казната е мала. Многу лаги изнесоа, демек се грижеле за мојата ќерка додека беше во кома и носеле влажни марамчиња за хигиена. Тоа е сè лага. Никогаш не се јавија да прашаат како е, а камоли да се грижат“, кажа Душанка, која вели дека утехата ја бара во секојдневните контакти со дел од лицата кои добија органи од Верче.
Верица стана еден од симболите на македонското органодарителство, откако по нејзината клиничка смрт семејството одлучи да се донираат органите.
