Поранешниот директор на УБК, Сашо Мијалков, денеска се појави во Кривичниот суд, на судењето за „Плацевите на Водно“, случај во кој што е еден од обвинетите.
Ова е негово прво појавување во судот откако пред Нова година (на 29-ти декември 2021) излезе од притвор со гаранција од 11 106 501 евро.
Минатото рочиште, кое беше закажано за 14-ти јануари се одложи, бидејќи тој беше во изолација поради позитивен тест на Ковид-19.
Пред да влезе во судницата Мијалков беше прашан од новинарите ‘кој е рецептот за милионите’, алудирајќи на неговата гаранција од 11 милиони евра. Мијалков одговори дека нема рецепт.
„Немам таков рецепт”, рече Мијалков.
Во судот денеска се појавиле и другите обвинети, меѓу кои и Орце Камчев, кој исто така беше во притвор, но и тој излезе на почетокот на месецов (4-ти јануари 2022) со гаранција од речиси 11 милиони евра.
