Ова е тоалетот во амбулантите во Бутел. Лоши се условите и во лекарските ординации, собата за интервенции, ходниците… Наутро во истиот објект работи и народна кујна и се дели храна на социјално загрозени лица.
Медицинските тимови од примарното здравство наместо два месеци, речиси цела година прегледуваат и лекуваат пациенти во лоши просторни и санитарно хигиенски услови. Во една просторија во која нема вода се сместени и докторот и сестрите. Нема приватност за пациентите. Тие беа преселени лани летото за да на просторот до општината се изградат модуларни објекти.
– Мора некое решение да се најде, ние го прифативме ова работиме. Нема да се откажеме,ќе пружаме помош на пациентите. Пациентите доаѓаат, но се малтретираат, нас не прашуваат, но ние не можеме одговор да им дадеме, вели д-р Маја Алексова, специјалист по семејна медицина.
– Модуларната амбуланта во Бутел почна да се гради лани во август. Како што може да се види и позади мене веќе е готова, но се уште не е пуштена во употреба.
Вакви објекти паралелно се градеа и во Ѓорче Петров и Лисиче. И таму се уште не се ставени во функција. Во меѓувреме во Ѓорче три докторки со медицинските сестри цела година работат со пациенти во субстандардни услови. Сите се сместени во една просторија која повеќе личи на дуќан отколку на амбуланта.
Од Министерството за здравство кој е инвеститор на објектите без прецизен одговор кога ќе бидат отворени модуларните амбуланти и кога во нив ќе почнат да работат медицинските тимови кои беа преселени.
– Амбуланта Бутел, Амбуланта Ѓорче Петров и Амбуланта Лисиче, се реализирани. Во изминатиов период се вршат технички прегледи од страна на Надзорниот орган.
Во процедура е пуштањето во употреба, по што ќе се предадат на користење на Здравствен дом Скопје, велат од МЗ.
Инаку според планот на Министерството за здравство овие модуларни објекти требаше да бидат реализирани за 60 дена, но тој рок одамна помина.
