Фондот за здравствено осигурување на Република Северна Македонија (ФЗОРСМ) попладнево соопшти дека институцијата се соочува со технички проблеми предизвикани од хакерски напад, но дека пациентите ќе можат да се лекуваат непречено. Сајбернападот онеспособил дел од ИТ-системите, велат од Фондот.
-И покрај детектираните технички проблеми и нефункционалности на дел од електронскиот систем, пациентите ќе можат и понатаму непречено да се лекуваат на сите клиники, како и преку матичните лекари кои можат да вршат прегледи, да издаваат упати и рецепти кои се подигнуваат во аптеките без застој, соопшти ФЗОРСМ.
Моментно, ФЗОРСМ се справува со сајбернапад кој предизвикува нефункционалност на дел од ИТ системите. Експертски тим работи 24/7 на справување со предизвиците и нивно отстранување во најбрз можен рок, велат од Фондот.
-Приоритет се дава на најбрзо можно враќање во функција на системот за исплата на боледувањата, породилното и рефундациите, а ФЗОРСМ веќе има издадени упатства кон подрачните служби за решенија со кои граѓаните тековно ќе ги остваруваат своите права. Во интерес на прецизно информирање на граѓаните, во најбрз можен рок, и штом се утврдат повеќе информации, јавноста ќе биде навремено известена, наведуваат од ФЗОРСМ.
