Украинскиот претседател Володимир Зеленски денеска ја одбележа првата годишнина од почетокот на судирот во солзи за илјадниците војници и цивили кои загинале во војната.
На студеното и облачно утро, 45-годишниот претседател им се обрати на вооружените сили и помала група службеници на Плоштадот Света Софија, кај катедралата со зелено-златна купола како симбол за отпорот на градот.
„Горд сум на вас“
„На сите кои се борите за Украина, сакам да ви кажам – горд сум на вас. Сите ние, секој од нас е горд на вас“, рекол Зеленски одвај задржувајќи ги солзите додека ги одликувал војниците со „Орден херој на Украина“.
Во текот на интонирањето на државната химна, присутните ги наведнале главите во текот на едноминутното молчење, а Зеленски плачел.
Зеленски во земјата и натаму е популарен, а на жителите секојдневно им се обраќа со пораки снимени со паметен телефон, а на тој начин комуницира и со светот и бара што поголема меѓународна поддршка за пари и оружје. Во 15-минутното видео, објавено во медиумите со наслов „година на непобедливост“, ветил дека ќе го порази непријателот.
„Најдолг ден во нашите животи“
„Пред една година на денешен ден, од ова исто место околу седум наутро, ви се обратив во кратка изјава, во траење од само 67 секунди. Ние сме силни. Подготвени сме на се. Ќе победиме секого. Вака почна 24-ти февруари 2022-ра година. Најдолгиот ден во нашите животи. Најтежок ден во нашата понова историја. Рано се разбудивме и од тогаш не спиеме“, рекол Зеленски.
