Цело соседство го забавува тригодишно дете, кое мора да седи дома зашто се лекува од рак.

Заедницата во Вејмут, Масачусетс, се обидува да го забавува тригодишниот Квин Вотерс изведувајќи трикови, пеејќи песни и возејќи камиони пред неговиот двор. Квин мора да седи дома во изолација откако претходно имаше трансплантација на матични клетки и хемотерапија во голема мера што го сруши неговиот имунолошки систем.

На Квин му бил дијагностициран медулобластом – форма на карцином на мозокот – во април и сега мора да остане дома и да биде на ригорозна диета.

Но, пријателите и непознати луѓе секојдневно запираат покрај неговиот прозорецот и го поздравуваат, го забавуваат во обид да му помогнат да ужива во животот и покрај неговите медицински проблеми.

Фото: Associated Newspapers

Без оглед дали некој пее песна или жонглира, или едноставно свири со свирката од автомобилот, Квин внимателно следи што се случува надвор.

– На Квин му беше дијагностициран карцином на мозокот оваа година, по само неколку дена од неговиот роденден – вели неговата мајка Тара Вотерс, која е полицаец во полицискиот оддел во Квинси.

– Посетите почнаа кога еден мој пријател, кој е музичар, ја промени песната „The Mighty Quinn“ за да одговара на Квин и дојде да му пее под прозорец. Потоа моите колеги од единицата за специјални операции беа во близина и застанаа да го поздрават. Сите го прават тоа од љубов кон Квин. Луѓето се неверојатни. Специјалната единица на полицијата организираа масивна борба со балони полни со вода, а Квин ептен се израдува – рече неговата мајка.

– Секоја мала или голема посета му го прави денот поубав. Тоа е неговиот прозорец кон светот. Добро е што може да се дружи и да остане нормален, макар тоа било и низ прозорец. Така што, и покрај оваа ужасна болест, постои добрина во светот и Квин имаше искуство што некои деца никогаш го немале. Тој не бара да оди надвор и не се лути што не може, не се сожалува себеси и има позитивен поглед кон животот. Се смее и игра сè до вечерта. Неговата фраза е: „Ова е најдобриот ден досега“, и ја повторува повеќе пати секој ден.