Над 18 илјади картички за мобилен интернет ќе овозможат околу 30 илјади семејства да имаат пристап до интернет за децата од основните и средните училишта да можат да ја следат наставата онлајн до крајот на школската година. Телеком потпиша договор со Министерството за информатичко општество и администрација за донација на овие картички, а дистрибуцијата ќе биде преку Минситерството за труд и социјална политика.
„Сега е важна солирадрноста. Важна е дигиталната трансформација. Така ќе се испорачуваат сите услуги до сите граѓани. Договорот со ‘Телеком’ се овозможува наставата во основните и средните училишта да е достапна за сите. Имајќи предвид дека имаме деца кои не можат да ја следат од далечина, се наметна потребата да им помогнеме. „Телеком“ донира 18 илјади и 400 картички за достапност на интернет. Дистрибуцијата на картичките до социјално загрозените семејства ќе ја спроведува Министерството за труд и социјална политика. На овој начин обезбедуваме интернет за секое дете. Ова се вонредни времиња и потребна е вонредна помош“, рече министерот за информатичко општество и администрација, Дамјан Манчевски.
Директорот на „Телеком“ посочи дека главната цел е да се обезбеди еднакви услови на сите деца кога во прашање е онлајн наставата.
„Еден од најголемите приоритети е да се обезбеди непречено образование на децата. Не сите деца можеа да учат од далечина. Иако сме земја со фиксен интернет, околу 18 илјади и 400 домаќинства не можеа да ја следат наставата. ‘Телеком’ донира мобилен интернет за основци и средношколци за да ги следат наставните програми до крајот на учебната година. Ова е чекор напред за да се обезбеди еднакви услови за дигитална настава за сите деца. Вклучувањето на ранливите категории во дигиталното општество не е ново“, рече Никола Љушев, директор на „Телеком“.
Министерот за образование и наука, Арбер Адеми, на прес-конференцијата рече дека со ова се решава прашањето за пристап до интернет на социјално загрозените семејства.
извор:usb
