Лидерот на Беса, Биљал Касами ја превзема градоначалничката функција во тетово од Теута Арифи, кадар на ДУИ, по победата во вториот круг од локалните избори.
Откако го потпишаа и документот за примопредавање на функцијата и се ракуваа, новиот тетовски градоначалник по добивањето на уверението од Општинската изборна комисија, почна да го користи и градоначалничкиот кабинет.
-Со нашата победа се врати надеж за достоинствен живот во Тетово – градот на историјата, културата и знаењето и традицијата. Свесни сме дека од денеска мене и мојот тим ме чека многу тешка и напорна работа, но со професионалниот и моралниот капацитет што го имаме без трошка сомнеж ќе успееме. Од овој момент ќе започне скенирање на актуелните состојби во општина Тетово и веднаш согласно законските одредби ќе ангажираме специјалисти надвор од институцијата за целосна ревизија, изјави Касами.
Касами рече дека оние кои никогаш не се појавиле на работните места и земале плати од општината, ќе ги повикува сами да се повлечат и да се одјават од нивните работни места.
– Се надевам до крајот на неделата дека ќе имаме стодневен акциски план кој ќе го објавиме во јавноста. Од утре сме на терен и ќе реализираме ветено во кампањата, рече Касами.
