Поранешниот британски премиер Тони Блер ги нарече идиоти луѓето што одбиваат вакцина против ковид-19, а можат да ја примат, односно што немаат медицинска причина да ја одбијат.
„Искрено, ако не се вакцинирате, а можете да примите вакцина, односно немате никакви здравствени причини да не ја примите, не сте само неодговорен, туку сте идиот“, рече Блер.
Во интервју за радиото Тајмс Блер рече дека оние што решиле да не се вакцинираат не треба да се третираат грубо, туку треба да се убедат да се вакцинираат.
„Може да има разни причини, но, искрено, вакцинацијата е во нивен интерес, дури и ако го игнорираме јавниот интерес“, рече Блер.
Тој додаде дека одлуката за вакцинирање деца помлади од 12 години „требаше да биде донесена пред некое време“.
„Не знам што чекавме толку долго“, додаде тој.
Блер рече дека ја поддржува одлуката на британската влада да не воведува нови рестрикции пред Божиќ, но ја опиша одлуката како „неверојатно тешка“ и „ризична“.
