Илјадници туристи би можеле да бидат загрозени денес во југоисточна Австралија, каде што пожарникарите се подготвуваат за нов бран шумски пожари поради новиот топлотен бран во земјата.
Неколку стотици шумски пожари моментно беснеат во Австралија. Повеќе од 30.000 луѓе се повикани на евакуација од туристичка област во државата Викторија на југоистокот на Австралија во неделата. Властите стравуваат од ширење на три пожари како резултат на ветрот, што може да предизвика прекини во сообраќајот на магистралниот пат во областа.
Локалните власти соопштија дека сè уште има многу локални жители и туристи во околината и дека може да бидат загрозени. Деновиве во тие делови на Австралија имаше повеќе од 40 Целзиусови степени, како и грмежи со голем ветер.
Противпожарната служба соопшти дека може да биде „опасен ден“ денес, поради молња што може да предизвика пожар. Најмалку десет лица се убиени од септември во пожари кои уништија околу 1.000 домови и повеќе од три милиони хектари земја.
