По четири обиди денеска конечно почна судското рочиште за модуларната болница во Тетово.
Обвинетите се изјаснија за невини и изјавија дека нивната невиност ќе се докаже до крајот на процесот.
Поранешниот директор на болницата Фљорин Бесими во писмена изјава за ТВ21 вели дека овој почеток на процесот е важен за него бидејќи, како што вели, значи можност да ја докаже својата невиност во врска со трагичниот случај!
Два часа по почетокот на судењето, продолжението на главната седница беше одложено за 27 декември во 10:00 часот.
До откажување дојде поради несогласувањето на одбраната во врска со изведувањето докази од страна на Обвинителството. Бараат обвинителот да ги прочита сите докази, наместо да ги наведува само насловите.
Истовремено, имаше и забелешки дека некои од насловите не се вклучени во списокот на докази што обвинителот ги доставил до Судот.
Инаку, Обвинителството на 27 јули поднесе обвинителен акт, откако десет месеци водеше истрага во која стручни анализи и вештачења вршеа МВР, Техничкиот факултет, електроинженери и истражни експерти од германската федерална Полицијата за криминалистика. Во октомври 2021 година, по вештачењето на МВР, обвинителството информираше дека пожарот во модуларната болница бил предизвикан од изгорен кабел, на кој биле приклучени апаратот за реанимација-дефибрилатор, полначот за мобилен телефон и уште еден уред.
