Три лица во градот Офенбах во Германија се уапсени од страна на германската полиција под сомнение дека планирале бомбашки напад во име на Исламската држава. Помеѓу тројцата уапсени е и 24-годишен Германец со македонско потекло. Тој е главниот осомничен во истрагата. Според германските власти тој имал намера да произведува експлозиви, а имал обиди да набави оружје и на интернет. Негови соучесници биле и двајца Турци во раните дваесетти години, јавува Еуроњус.
Според обвинителот во Франкфурт којшто е надлежен за истрагата, тројцата осомничени во минатото се идентификувале како поддржувачи на ИСИС.
Во домот на главниот осомничен биле пронајдени супстанци и опрема за изработка на експлозиви, а обвинителството запленило документи и компјутерски податоци. Осомничените денеска се изведуваат пред надлежниот судија во Германија.
