Македонецот Денис Митревски, кој живее во Перт, Австралија, и Анџело Реитано се креатори на играчката Mommy’s Tiny Helper (Малиот помошник на мама). Митревски одамна е дел тимот што креираше генијална играчка за деца, што истовремено чисти по дома. Родителите пишуваат коментари за тоа колку се задоволни од играчката која им помага во домаќинството, но дел од мајките го критикуваат името. Играчката во суштина претставува количка со вграден механизам за собирање трошки. Првично беше креирана за американскиот пазар и во 2019 година беше претставена на тамошниот Саем за играчки.
На официјалната фејсбук-страница може да се забележат голем број коментари за тоа колку децата се задоволни од играчката и дека таа не само што е убава туку и корисна за во домаќинството.
Во промоцијата и продажбата на играчката на Денис му помага и неговата сестра Сем Минити. Британскиот „Дејли меил“ пренесува дека таа е во неверување откако на дел од австралиските групи за мајки на социјалните мрежи добила негативни коментари, но не за производот, туку за неговото име.
Според дел од мајките во Австралија, проблемот е во тоа што играчката се вика Mommy’s tiny helper (Малиот помошник на мама), а во 2021 година чистењето во домаќинството не е работа само на мајката. Дел од фејсбук-коментарите објавени на „Дејли меил“, поврзани со името на дизајнот, гласат:
„Името е слатко, ама подразбира дека чистењето е женска работа“.
„Се согласувам. Можете да го викате само Little Helper (Мал помошник)“.
„Лично мислам дека зборот ‘мама’ треба да се извади, кај нас дома работите ги вршиме 50/50: готвење, чување деца итн., затоа не сметам дека е добро да се налага дека само мама чисти. Исто така, многу деца немаат мајки…“ – се вели меѓу другото во еден од коментарите.
