Страницата „Ветераните за Трамп“ на Фејсбук била хакирана од бизнисмен од Македонија, пренесува „Вашингтон Пост“. Биле потребни месеци за сопствениците да ја вратат контролата над страницата.
Станува збор за Фејсбук страница со над 100 илјади следбеници кои се претежно ветерани кои го поддржуваат американскиот претседател Доналд Трамп. На страницата претежно се објавуваа вести поврзани со прашања за ветераните и конзервативни вести, се до март оваа година кога „Ветераните за Трамп“ била хакирана од бизнисмен од Македонија.
„Бизнисмен од Северна Македонија ја киднапирал страницата оставајќи ги Американците беспомошно да гледаат како таа работи под странска контрола“, пишува американскиот медиум.
Според „Вашингтон Пост“, откако страницата била хакирана, истата продолжила да функционира, меѓутоа поради тоа што веќе била под „надворешна контрола“, се споделувале поинакви вести и дезинформации кои довеле до недоразбирања.
Ветераните и активните членови на американската армија се популарен таргет на „фабриките на лажни вести“ кои што е обидуваат да ги манипулираат онлајн затоа што нивниот одзив на изборите е меѓу најголемите во САД.
Токму овој пример „Вашингтон Пост“ го посочува како еден од примерите во кои парите, политиката и дезинформациите остануваат прилично влијателни во онлајн просторот и во пресрет на претседателските избори во САД кои се закажани за идната година.
Планот за преземање на Фејсбук страницата започнал со навидум наивна понуда до администраторите на страницата, која ја испраќа некој кој се претставува како Андреј Спасовски и нуди објавување на реклами кои ќе резултираат со профит од десетици илјади долари годишно. Трансакциите кои ги понудил Спасовски требало да се вршат преку фирмата „Ад Брејк“ регистрирана во Куманово.
