Премиерот Зоран Заев денеска на почетокот на изградбата на висечкиот мост „Љубљанска“, одговарајќи на новинарско прашање, рече дека земјата ќе ја чини 74.000 денари привремениот прием на Авганистанци во земјата.
Вчера портпаролот на Владата соопшти дека последната бројка на примени Авганистанци би била 780, но Заев тврди дека овој податок варира и дека дури е можно да се намалува, затоа што некои од нив биле префрлени на други дестинации наместо да пристигнат во Скопје.
Заев сепак не нагласи дали 74.000 денари би бил вкупниот трошок или пак за секој примен Авганистанец одделно, со оглед на тоа што се очекува сместувањето да биде финансирано од САД и од меѓународните организации.
– 74.000 денари најверојатно. затоа што сместувањето на луѓето, исхраната, се што треба за таквите луѓе, кои што верувам дека овие денови ќе стигнат. Верувам дека ќе стигнат граѓани миротворци и активисти за човекови права, луѓе кои влијаеле на демократијата и асистенти и на нашата армија.
Се определивме за поголема бројка затоа што имаме големо срце и сме живееле во регион кој трпел конфликти. Еден човек да спасиме, мислам дека го спасуваме светот. Така да бројките никој не може да ги каже, некои од предвидените се откажале, отишле на некоја друга дестинација, рече денеска Заев.
