Министерството за внатрешни работи соопшти дека објавило оглас за ангажирање на јасновидци, пророци, бајачи и гатачи, со цел еднаш засекогаш да се стави крај на сагата со инвеститорот на дивоградбата кај Мавровка и да се открие неговиот идентитет.
Од МВР се надеваат дека за разлика од огласот за рушење на дивоградбата, овојпат ќе има пријавени, иако најголем дел од јасновидците кои ги контактиравме рекоа дека шансите тоа да се случи се еднакви на шансите инвеститорот сам да си ја сруши дивоградбата.
– Искрено, нема да се пријавам на огласот зошто во последно време третото око ич не ми работи. Ама пак можам да предвидам дека доколку по некоја случајност ѝ помогнам на полицијата и го откријам газдата не ме чека баш убава иднина. – ни рече еден од нив и не’ преколнуваше да остане анонимен.
Огласот ќе биде отворен до понеделник, а доколку до тогаш никој не се пријави, МВР најави дека сите регистрирани јасновидци, бајачи, гатачи и пророци ќе бидат уапсени за надрилекарство и лажно претставување.
Текстот е измислен со цел да привлече внимание и малку да ве насмее..
Извор: Коперација
