ДУИ нема пуштено никакво официјално соопштение за средбата која завчера се оддржа помеѓу претседателот на партијата Али Ахмети и новоизбраните пратеници.
Како што велат партиски извори, Ахмети не си отиде задоволен од оваа средба, бидејќи пратениците не му дадоа зелено светло за идејата премиерот Албанец да биде на крајот на мандатот според системот 100 дена или 3 + 1.
„Претседателе, подобро е да одиме во опозицијата и по четири години да се вратиме посилни, отколку да влеземе во Владата усрамени без премиер Албанец. Никој повеќе нема да ни верува.
Подобро е воопшто да не влегуваме во влада отколку со навредливиот предлог да имаме премиер само една година на крајот од мандатот, или уште полошо, само 100 дена“, беа ставовите на пратениците на средбата со Ахмети. Истите партиски извори за Весникот Лајм велат дека пратениците побарале од Ахмети да не шета по ходниците на македонските партии со Артан Груби, туку да се стационира во Речица и да покаже дека ДУИ е партијата која одлучува, а не партија што се моли за парче власт.
„Ахмети, наместо да им се заблагодари на пратениците за оваа поддршка, си заминал малку незадоволен. Тој очигледно имал намера да им ја префрли одговорноста на пратениците за влегување во влада без албанскиот премиер, но тоа не помина, туку напротив, повеќето од пратениците на ДУИ побараа од Ахмети да одлучи во интерес на Албанците, а не под влијание на Артан Груби и Муса Џафери, кои по секоја цена сакаат ДУИ да биде на власт “, потенцираат истите партиски извори за Лајм.
Извор: Лајм
