Нема да пропадне државата ако ги вметнеме Бугарите во Уставот кои на број се нешто над три илјади луѓе. Македонската сувереност нема да се загрози, ниту пак европскиот пат ако се направи овој чекор“, рече шефот на државата Стево Пендаровски на заедничката прес конференција со австрискиот претседател Александер Ван дер Белен кој е во посета на Македонија.
Пендаровски порача дека за да се достигне потребното двотретинско мнозинство во Собранието за уставни измени е потребно да се разговара со опозицијата.
„Ако опозицијата реши да не учествува ниту на експертско, ниту на политичко ниво, бескорисно ќе биде јас да се понудам за решавање на проблемот. Можам само да ја повикам опозицијата да учествува и можам да потсетам дека всушност зборуваме за прашања кои сме ги решиле пред дваесетина години со формулација ‘делови од народ’“, рече Пендаровски.
На прашање од новинарка од Радио Австрија за условувањата од Бугарија во врска со македонската евроинтеграција и дали е можно да се добијат и нови условувања со нови прашања, Пендаровски рече:
„Условите кои последниве две години ни ги поставува Бугарија никој не можеше да ги предвиди ниту во Брисел ниту тука. Затоа што во 2017-19 година, кога правевме уставни измени и променивме име, беше ветено дека нови барања нема да има. Во тој консензус беше и Бугарија.
Нашето референдумско прашање беше дали да се додаде Северна во името за да станеме членка на НАТО и да почнеме преговори со ЕУ.
Верувавме дека нови барања нема да има“ – рече Пендаровски според кој граѓаните оправдано прашуваат дали ќе има и нови барања од друга или од истата земја и доколку ги направиме уставните измени.
