Општина Крушево избра идејно решение за уредување на гробот на Тоше Проески. Со тоа е откочена процедурата за изградба на достојно почивалиште на музичката ѕвезда, 12 години по неговата трагична смрт.
Следните фотографии го прикажуваат идејното решение од неколку агли, а ги добивме по барање упатено до општината.
![](https://360stepeni.mk/wp-content/uploads/2019/06/Ova-1-1024x576.png)
![](https://360stepeni.mk/wp-content/uploads/2019/06/Ova-1-1-1024x498.jpg)
![](https://360stepeni.mk/wp-content/uploads/2019/06/viber_image_2019-06-25_14-16-47-2-1024x498.jpg)
![](https://360stepeni.mk/wp-content/uploads/2019/06/Idejno-reshenie-Toshe-2-1-1024x498.jpg)
![](https://360stepeni.mk/wp-content/uploads/2019/06/Idejno-reshenie-Toshe-1-1024x498.jpg)
Автор на идејното решение е Жарко Чаушевски, кој бил и единствениот пријавен на конкурсот. Истиот автор победи на конкурсот за уредување на гробот на Проески и пред неколку години, но таа идеја не се реализираше. Меѓу другото, затоа што објектот беше и поголем и поскап. Како што открија прислушуваните разговори, проектот бил и предмет на политички калкулации на тогашната власт на централно ниво.
Чаушевски и е познат на македонската јавност по неколку идејни решенија за објекти што се дел од проектот „Скопје 2014“, меѓу кои – новата фасада на Владата и преслекувањето на ГТЦ во барок (што не се реализираше).
![](https://360stepeni.mk/wp-content/uploads/2019/06/zarko-causevski.png)
За изгледот и содржините на идејното решение за почивалиштето на Тоше Проески било консултирано и неговото семејство. Но, сега се потребни пари. Од општина Крушево проценуваат дека изградбата ќе чини околу 150 илјади евра, средства за кои веќе аплицирале до Министерството за култура.