ВМРО-ДПМНЕ ќе победи на изборите во среда прогнозира последното истражување на јавното мислење спроведено од институтот Хабеас Корпус, објавено денеска.
Според него, 20,8% од граѓаните ќе гласаат за ВМРО-ДПМНЕ а 16,8% својот глас ќе го дадат за коалицијата на СДСМ и БЕСА.
ДУИ ќе добие поддршка од 4,9% од граѓаните а за коалицијата Алијанса – Алтернатива ќе гласаат 2,7%. Во истражувањето 17,8% од граѓаните не сакале да дадат одговор, 13,9% велат дека се уште не знаат а 22,2% велат дека нема да гласаат.
Истражувањето на овој институт покажува предност на ВМРО-ДПМНЕ во сите изборни единици со исклучок на шестката каде предноста е за кандидатот на СДСМ.
Анкетата на Хабеас корпус е спроведена телефонски во периодот од 29 јуни до 3 јули годинава врз репрезентативен примерок од 1203 испитаници и подлежи на маргина на грешка од плус-минус 2%
Денеска и СДСМ ја објави анкетата на агенцијата Брима Галуп која пред неколку дена протече во јавноста.
Како што стои во соопштението на партијата 18,7% од граѓаните би гласале за СДСМ а 15,1% за ВМРО-ДПМНЕ. Според истата анкета, за ДУИ ќе гласаат 8,2% а за Коалицијата на Села и Гаши 4,9%. Иако е во коалиција со СДСМ, БЕСА според оваа анкета ќе добие поддршка од 2,6% од гласачите.
Според оваа анкета 16,1% нема да гласаат, 11,2% се уште не решиле а 9,3% не сакаат да одговорат.
Истражувањето на агенцијата Брима Галуп е спроведено по нарачка на СДСМ во периодот од 5 до 14 јуни годинава врз репрезентативен примерок од 1174 испитаници користејќи телефонска анкета.
