Водени од принципот на достапност и отвореност кон граѓаните, воведовме повисоко ниво на транспарентност на локалната самоуправа и во таа насока подготвивме едно резиме, во кое се сублимирани најважните детали и преку кое може да се направи анализа на сето она што го направивме во изминатите 365 дена, рече градоначалникот на Општина Охрид, Кирил Пецаков на денешниот отчет за сработеното во првата година од мандатот.
Свесни дека финансиската стабилност на општината е главната основа за успешно функционирање, исклучително бевме посветени на процесот на раздолжување. Затекнатиот долг од 856.831.830 денари, успеавме да го намалиме за 202.214.512 денари. Ја санираме лошата финансиска состојба во образованието. Ги сервисиравме сите заостанати обврски и за прв пат сите општински училишта ја започнаа новата учебна година со нула долгови. Посветено работиме и на подобрување на финансиската состојба во сите јавни претпријатијата кои ги затекнавме во многу лоши услови, истакна Пецаков.
Изминатата година, рече Пецаков, посветено е внимание и на подготовка и реализација на инфраструктурни проекти за подобри услови за живеење на сите граѓани.
За само 365 дена изведена е водоводна линија со вкупна должина од 1520 метри, поставена е фекална и атмосферска каналаизација во вкупна должина од 3295 метри, асфалтирани се улици со вкупна површина од 14.138 м2, извршено е поплочување на улици во вкупна површина од 1550 м2 и извршено е партерно уредување со вкупна површина од 5600 м2, изградени се два резервоари за вода кои беа неопходни за граѓаните, санирани се и изградени голем број потпорни ѕидови, инвестирано е во спортската инфраструктура и урбаната опрема, подготвени се основни проекти и технички документации за 20-тина инфраструктурни проекти кои ќе бидат реализирани во текот на наредната година, вели Пецаков.
Во отчетот градоначалникот Пецаков се осврна и на инвестициите во сите училишни објекти во вредност од 20.148.000 денари, како и на воведените новини во делот на поддршката на талентирани ученици, обезбедената поддршка за семејствата на првачиња, како и неколкуте подготвени проекти за реконструкција на училиштата кои ќе бидат реализирани во иднина.
Во континуитет даваме поддршка на проекти за промоција на туристичките потенцијали, културното и природното наследство, како и унапредување на културните и духовни вредности. Бевме исклучително посветени на поддршка на спортот, а на наша голема гордост оваа година застанавме зад организацијата на јубилејното издание на „Охридскиот пливачки маратон“. Во насока на продолжување на туристичката сезона, оваа година за прв пат организиравме „Фестивал на вино“ кој беше надополнет со богата забавна програма со што се привлече вниманието и на жителите и на туристите, потецираше Пецаков.
Но, додаде Пецаков, секој успех не би бил вреден доколу не е верификуван од граѓаните, бидејќи тие се најголемите сојузници во борбата за подобар Охрид.
Охриѓани гледаат кој работи, кој е искрено посветен и кој вистински работи за интересите на градот. Нивната оценка ќе остане мојот најголем мотив и заедно со нив, преку јасна визија и план ќе продолжуваме понатаму кон остварување на нашите цели, а тоа се подобри услови за живеење во нашиот Охрид!, рече градоначалникот Пецаков.