Денешниот датум, 14 јуни, е еден од најсветлите во историјата на фудбалскиот клуб Вардар, бидејќи на овој датум во 1987 година, Вардар стана шампион на лигата на поранешна Југославија. Вардар е единствен клуб од Македонија кој успеал во тоа. Тоа беше титула со која беше прославена 40-годишнината од постоењето на клубот.
Пред 32 години, на денешниот ден 14 јуни, се одигра последното коло, по кое Вардар остана прв и стана шампион. Во таа сезона, десет тимови во првенството почнаа со минус 6 бодови, врз основа на тогашната одлука на Фудбалскиот сојуз да им бидат одземени поени, поради сомнителните резултати во последното коло од сезоната 1985/86. Подоцна судот ја поништи одлуката, бодовите беа вратени на зелена маса, и титулата му беше дадена на Партизан, но сепак Вардар играше во Купот на европските шампиони како првак на Југославија.
Тогашниот тренер Андон Дончевски истакнуваше амбиции за опстанок, со скриена намера да се обезбеди место во Европа, а на крајот „црвено-црните“ дојдоа и до титулата.
Таа сезона за Вардар настапуваа Тони Савевски, Илија Најдоски, Драган Канатларовски, Дарко Панчев, Љупчо Марковски, Вујадин Станојковиќ, Јовче Џипунов, Бобан Бабунски, Чедомир Јаневски, Момчило Грошев, Милко Симовски, Љупчо Лазаров, Венцислав Симоновски, Мирко Петров, Благоја Тодоровски, Никола Аврамовски, Зоран Трајчевски, Горан Стојановиќ, Николче Филипов, Васил Рингов, Тони Атанасовски, Јовко Бизимовски. Дел од Вардар во есенскиот дел од сезоната беа Слободан Горачинов и Гоце Димовски кои што заминаа во странство во текот на шампионатот.
Екипата беше предводена од тренерот Дончевски, заедно со неговите асистенти Методије Спасовски и Кочо Димитровски.
