Млад маж од Украина успеа да избегне служење на воен рок, останувајќи две години во брак со жена која е 57 години постара од него. И покрај бројните критики, законот е на неговата страна.
Кон крајот на 2017 година, Александар Кондратјук добил повик за служење на едногодишен воен рок. Сите воено способни Украинци на возраст помеѓу 18 и 26 години мораат да поминат воена служба, а исклучок од тоа правило настанува само доколку се одговорни за жена со инвадилитет. Александар некако успеал да ја увери 81-годишната баба да се омажи за него.
За две години, тој ќе стане стар за служење на воен рок и тогаш веројатно ќе се разведе од својата сопруга, пишуваат украинските медиуми.
Бизарниот случај почна да ги полни насловните страници во медиумите на почетокот на минатата година, кога воениот аташе поднесе пријава до обвинителството со надеж дека ќе успее да го поништи бракот.
Од војската беа уверени дека Александар ги лажирал документите за да го избегне служењето на воениот рок, но истрагата покажа дека парот легално се венчал. Откако стигна потврдата дека бракот е законски, војската се откажа. Сепак, украинскиот печат повторно ја оживеа приказната прашувајќи ги претставниците на војската што планираат да преземат во врска со овој случај.
Кондратјук негира дека со жената се оженил за да ја избегне војската и тврди дека има чувства за неа. Неговата сопруга пред новинарите изјави дека Александар е добар сопруг и се грижи за неа.
Соседите на жената, од друга страна, пред медиумите рекоа дека нивниот брак е измама.
