Жители на егзотичното село и општина Вевчани во близина на Струга стравуваат дека лекар од тамошна амбуланта воопшто нема диплома за завршено високо медицинско образование.
Според повеќе извори во општина Вевчани селски доктор кој со години се грижел и се уште официјално се грижи за здравјето на граѓаните во овој крај, воопшто не дипломирал на медицински факултет.
Тој веќе неколку години работел како лекар во локалната државна здравствена установа а дури минатата недела локални жители биле информирани дека има проблем со неговото формално образование.
За своите сомнежи Вевчанци ги информирале полициските претставници во Струга. Од локалната полиција не даваат никаква информација за можниот скандал со несертифициран лекар.
Доколку се потврди дека лекар без диплома се вработил во здравствен дом и се грижел за здравјето на граѓаните на Вевчани со години, за лекарот и тие што го примиле на работа можат да следуваат долгогодишни затворски казни.
