Нереални се најавите на власта дека автопатот Охрид-Кичево ќе биде готов до крајот на 2023 година, иако владините претставници уверуваат дека од наредната година, граѓаните ќе возат по модерен автопат, вели за Алсат, градоначалникот на општина Дебрца, Зоран Ногачески, на чија територија се наоѓа голем дел од делницата.
„Од 2014, сега сме 2023 година, некако како сè уште да сме далеку од целиот тој проект… Ова што го гледам, бидејќи постојано сум во движење низ мојата општина, мислам дека далеку се работите дека ќе бидат завршени до крај на 2023“, рече Зоран Ногачески, градоначалник на Дебрца.
Дополнително на ова, сè уште има голем број граѓани кои водат судски спорови со државата во однос на висината на цената за одземеното земјиште. А, почетокот на работите кај самиот влез на Охрид деновиве создаде голема тензија меѓу локалната и централната власт. Општина Охрид бара веднаш да се отвори патот, затоа што пренасочувањето на сообраќајот среде летна туристичка сезона кон стариот пат, создава хаос и револт кај гостите.
„Во очи на почеток на летната туристичка сезона да се затвори главниот приод кон Охрид е погубна одлука… Со ваквата одлука голем број на семејства чија главна егзистенција е туризмот ќе останат без приходи. Се создава проблем и кај хотелиерите…“, велат од Општина Охрид и Угостителите.
Алсат праша во Влада дали ќе одговорат позитивно на ваквото барање, но одговор не добивме. Инаку, туристичките работници раскажуваат дека автобусите со странски туристи, од аеродромот до хотелите во Охрид патуваат два и пол часа, онолку колку што летаат од Холандија или од Полска до Охрид.
Мики Трајковски Alsat Tv
