Анализата со која биле опфатени 15 земји од светот покажува дека жените најдолго живеат во Швајцарија, каде очекуваниот животен век изнесува дури 79,03 години, а Австралија води кога е во прашање очекуваниот животен век на мажите (74,1 година).
Научниците од универзитетот Пенсилванија на чело со д-р Мишел Гило ги анализирале податоците од 15 земји во Европа, Северна Америка и Азија, во кои животниот век е долг. Помеѓу останатото, во тие земји спаѓаат и Норвешка, Јапонија, Шпанија, Данска и Белгија.
На дното на листата за жени се наоѓаат Италијанките чиј очекуван животен век во просек изнесува 72,14 години. Најкраток просечен животен век имаат мажите во Португалија: 64,77 години.
Д-р Колин Пејн од Австралискиот национален универзитет, кој бил еден од лидерите на студијата, истакнал дека е врежано мислењето дека Јапонија и нордиските земји покажуваат одлични резултати кога се во прашање здравјето, благосостојбата и долговечноста.
“Но, исто така и Австралија. Резултатите се последица од трајната стабилност и фактот дека Австралија има висок животен стандард долго низ годините. Едноставните работи како што се доволната количина на храна и фактот дека не се соочуваат со големи конфликти играат важна улога”, додава Пејн.
Очекуваниот животен век на Јапонците е 68,52 години, а на Јапонките – 72,9.
Листа на земји во кои жените живеат најдолго:
– Швајцарија – 79,03 години
– Австралија – 78,79 години
– Норвешка – 78,61 година
– Шведска – 78,39 години
– Холандија – 78,17 години
– Велика Британија – 76,3 години
– Франција – 76,97 години
– САД – 76,43 години
– Данска – 75,83 години
– Финска – 75,17 години
Листа на земји во кои мажите живеат најдолго:
– Австралија – 74,1 година
– Шведска – 74 години
– Швајцарија – 73,7 години
– Норвешка – 73,1 година
– Холандија – 72,6 години
– Велика Британија – 72,33 години
– Данска – 71,87 години
– САД – 71,57 години
– Финска – 69,21 година
– Белгија – 68,83 години
